Reyna að koma í veg fyrir annað verkfall

Slökkviliðs- og sjúkraflutningamenn hefja sextán klukkustunda langt verkfall á föstudaginn takist ekki samningar á fundi sem boðaður hefur verið á morgun. Sverrir Björn Björnsson, formaður Landssambands slökkviliðs- og sjúkraflutningamanna, segir enga formlega fundi hafa verið haldna frá síðasta verkfalli. Hann sé hins vegar alltaf bjartsýnn á að niðurstaða fáist.

Slökkviliðs- og sjúkraflutningamenn lögðu síðast niður störf 23. júlí síðastliðinn. Verkfallið á föstudaginn verður með sama sniði. Starfsmenn munu ekki ganga með boðtæki á sér og ekki verður hægt að kalla út aukamannskap ef stórkostlegur bruni eða önnur óhöpp verða.

Komi hins vegar til þriðja verkfallsins verður svo yfirvinnubann. „Þá getur það farið að verða snúnara, því að þá er ekki víst að það sé hægt að fullmanna vaktir," segir Sverrir. Sverrir er ómyrkur í máli gagnvart launanefnd sveitarfélaga. „Ég lít þannig á að hún beri ábyrgð á því að við erum komnir í þessa stöðu. Hún talar enn um það að það eigi bara að semja í haust," segir Sverrir.