Gleðigangan fer fram á laugardaginn

Hinsegin fólk heldur sína eigin þjóðhátíð á laugardaginn þegar hin árlega Gleðiganga fer fram í miðborg Reykjavíkur. Ásta Kristín Benediktsdóttir göngustjóri segir að undirbúningur hafi gengið vel og hún sé farin að hlakka alveg óstjórnlega til.

„Þetta lítur ljómandi vel út og verður glymrandi gott," segir Ásta í samtali við Vísi.. „Þetta verður allt með svipuðu sniði og áður," segir hún jafnframt og bætir við að gangan verði svipað stór og síðastliðin ár og að Páll Óskar Hjálmtýsson verði með lokaatriðið í Gleðigöngunni.

Að sögn Ástu verður helsta breytingin á göngunni sú að henni verður stillt upp á Snorrabraut en ekki við Hlemm eins og undanfarin ár. Klukkan 14:00 heldur gangan af stað niður Laugaveginn og endar við Arnarhól þar sem um klukkustundarlöng skemmtidagskrá tekur við.

Í tilkynningu sem Ásta sendi frá sér fyrr í dag kemur fram að hátíðarhöldunum fylgja götulokanir í kringum Snorrabraut og Lækjargötu. Göngustjórn Hinsegin daga íbúa og verslunareigendur í miðborginni vinsamlegast að hafa í huga að bílar geta lokast inni eða átt erfitt með að komast leiðar sinnar frá kl. 12:00 til 18:00 á laugardaginn. Mælst er til þess að bílar séu fjarlægðir af Laugaveginum fyrir kl. 12:00 á laugardaginn af öryggisástæðum því viss hætta er á að kyrrstæðir bílar verði fyrir ágangi af mannmergðinni og stórum bílum sem taka munu þátt í göngunni.

Einnig beinir lögreglan þeim tilmælum til ökumanna að þeir leggi ekki bílum sínum uppi á gangstéttum og umferðareyjum í miðborginni.