Bara sumir eigenda fengu tjón sitt bætt

Fjölmörg dæmi um meintan galla í spíssum Land Cruiser 120 bifreiða hafa komið inn á borð Fréttablaðsins í kjölfar umfjöllunar blaðsins síðustu tvo daga.

Borið hefur á bilun í bílum af þessari tegund, sem eru um fjögur þúsund talsins hér á landi. Meintur galli í spíssum leiðir til þess að grófsíur eiga til að stíflast, bílarnir ofhitna og hafa í nokkrum tilvikum brætt úr sér.

Toyota á Íslandi hefur neitað því að um þekktan galla sé að ræða. Heimildir Fréttablaðsins herma þó að þessi tilvik séu algeng. Þá er keimlík dæmi að finna erlendis, sérstaklega þar sem kaldara er í veðri, enda munu spíssarnir ekki hannaðir fyrir mikinn kulda.

Daníel Pálsson, sem rekur Smurstöðina að Fosshálsi 1 og þjónustar Toyota-bíla, segist þekkja fleiri dæmi um þessar bilanir og þær næmu einhverjum tugum. Toyota viti af málinu og hafi beðið þjónustuverkstæði um að hafa auga með einkennum.

„Okkur, sem þjónustum þessa bíla, er uppálagt að ef við sjáum eitthvað svart í grófsíum þegar við töppum af þeim, sendum við þá upp eftir [til Toyota].“

Hann segist þekkja nýlegt dæmi um að bíll hafi brætt úr sér af þessum sökum. „Við lentum í því að einn af viðskiptavinum okkar, sem hafði alltaf verið hjá okkur í smurningu, hringdi í mig ofan af fjöllum þar sem bíllinn hafði brætt úr sér,“ segir Daníel.

Viðkomandi var sendur til Toyota á Íslandi, sem skiptu um vél á eigin kostnað, sem gæti numið á milli 2 og 3 milljónum króna. Daníel bætir því við að Toyota hafi í það skiptið staðið sig vel og jafnvel útvegað annan bíl meðan á viðgerð stóð.

Fréttablaðinu hafa borist margar ábendingar um bilanir sem tengja má við meintan galla í spíssum og ber ekki öllum saman um viðbrögð Toyota. Sumir fá skipt um hlutina sér að kostnaðarlausu á meðan aðrir sitja uppi með háan reikning.

Páll Þorsteinsson, upplýsingafulltrúi Toyota á Íslandi, segir málið liggja í því hvort bílar séu í ábyrgð eða ekki. „En við skoðum hluti alltaf þegar þeir koma upp. Við skellum aldrei í lás og verðum að skoða hvert tilfelli fyrir sig og vega það og meta.“

thorgils@frettabladid.is