Gylfi nýtur áfram stuðnings

Þingflokksfundi Samfylkingarinnar lauk nú á fjórða tímanum en á fundinum var staða Gylfa Magnússonar, efnahags- og viðskiptaráðherra meðal annars rædd. Gylfi var sjálfur gestur á fundinum.

Gylfi hefur legið undir ámæli vegna lögfræðiálits um gengistryggð lán sem ráðuneyti hans barst í júní í fyrra en var ekki sagt frá opinberlega fyrr en fyrir örfáum dögum. Guðbjartur Hannesson, þingmaður Samfylkingarinnar, sagði í samtali við Vísi að hann teldi persónulega ekkert hafa komið fram á fundinum sem benti til annars en að Gylfi Magnússon nyti stuðnings þingflokksins.

Að öðru leyti vísaði Guðbjartur á formann Samfylkingarinnar eða þingflokksformann. Ekki hefur náðst í Þórunni Sveinbjarnardóttur þingflokksformann í síma.