Veita Pakistönum neyðaraðstoð

SOS Barnaþorpin á Íslandi hafa ákveðið að senda 1.2 milljónir króna úr neyðarsjóði samtakanna til hjálparstarfsins á flóðasvæðunum í Pakistan. Upphæðin dugar til að sjá 500 fjölskyldum fyrir nauðþurftum í tíu daga, eftir því sem fram kemur i fréttatilkynningu.

SOS í Pakistan hafa þegar hafið samstarf við innlendu samtökin Concerned Citizens of Pakistan (CCP) sem felur í sér að SOS kaupir matvæli og pakkar þeim inn en CCP sér um að dreifa matvælunum. Hver pakki kostar 20 dollara, eða 2400 krónur, og dugar 6-8 manna fjölskyldu í 10 daga.

Þá hafa SOS Barnaþorpin í Pakistan boðið yfirvöldum skjól fyrir þau börn sem misst hafa foreldra sína í flóðunum eða orðið viðskila við þá. Samtökin reka átta barnaþorp í landinu auk þess sem fjögur eru í byggingu. Ekkert þessara barnaþorpa skemmdist í flóðunum. Framlag Íslendinga er fengið úr neyðarsjóði samtakanna en alfarið er um frjáls framlög einstaklinga að ræða.