Góði hirðirinn gaf sjö og hálfa milljón

 „Við erum komin langleiðina að takmarkinu með þessari peningagjöf og erum alveg gríðarlega þakklát,“ segir Vilmundur Gíslason, framkvæmdastjóri Reykjadals, um peningagjöf Góða hirðisins, styrktarsjóðs Sorpu, upp á sjö og hálfa milljón króna. Gjöfin var afhent á sumarlokahátíð sumarbúðanna í Reykjadal í gær.

Styrktarfélag lamaðra og fatlaðra rekur sumarbúðir í Reykjadal fyrir börn á aldrinum fimm til 23 ára en einnig er boðið upp á helgardvalir yfir vetrartímann. Næsta vetur stóð til að bjóða ekki upp á þessar helgardvalir sökum fjárskorts. Aðstandendur efndu því til söfnunar og var takmarkið að safna 15 milljónum króna.

Vilmundur segir að safnist meira en 15 milljónir verði hann notaður til að bæta aðstöðuna og viðhald í Reykjadal.

Lokahnykkurinn í átakinu verður á þriðjudaginn þegar starfsmenn ganga 130 km leið rúllandi hjólastól á undan sér.

Þeim sem vilja leggja söfnuninni lið er bent á söfnunarreikninginn: 549-26-10 kt.630269-0249. -áp