Atlaga gerð að forstjóra Sjúkratrygginga

Það á augljóslega að gera fleiri atlögur að forstjóra Sjúkratrygginga, segir Guðlaugur Þór Þórðarson, fyrrverandi heilbrigðisráðherra sem nú á sæti í heilbrigðisnefnd Alþingis. Fréttablaðið greindi frá því í dag að Álfheiður Ingadóttir heilbrigðisráðherra hefði sett af stjórn Sjúkratrygginga. Stutt er síðan að Álfheiður hugðist áminna Steingrím Ara Arason, forstjóra stofnunarinnar, en hætti við eftir umfjöllun fjölmiðla.

Guðlaugur segir að það veki sérstaka athygli að ráðherra setji stjórnina af í heild sinni. Þessi stjórn hafi unnið bæði í sínu umboði og umboði Ögmundar Jónassonar. „Ég veit ekki til þess að það hafi komið nein málefnaleg gagnrýni á hennar störf. Það er svo sem ekkert óeðlilegt að það séu gerðar einhverjar breytingar á stjórn stofnunar, en það er mjög sérstakt að henni sé hent út í heilu lagi og önnur sett í staðinn," segir Guðlaugur.

Guðlaugur segir jafnframt að skipan nýju stjórnarinnar veki mikla athygli. „Það vekur athygli að það er aðili úr ráðuneytinu, sem er kannski ekki alveg það sem menn voru að leggja upp með í rannsóknarskýrslunni. Sömuleiðis eru þarna, ef ég man rétt, aðili frá Landspítalanum," segir Guðlaugur. Hann bendir hins vegar á að hugmyndin hafi meðal annars verið sú að Sjúkratryggingar myndu semja við Landspítalann.

„Á sama hátt er þarna manneskja sem hefur ekkert hikað við að ráðast á forstjóra Sjúkratrygginga og hefur stutt ráðherrann þegar að hún fór algerlega að tilefnislausu og án nokkurra málefnalegra ástæðna gegn honum," segir Guðlaugur og vísar þar til viðtals við Sigurbjörgu Sigurgeirsdóttur stjórnsýslufræðing skömmu eftir að Steingrími Ara var veitt áminning. Þá hafi Sigurbjörg ráðist gegn Steingrími Ara og störfum hans fyrir fjármálaráðuneytið þegar að hún hélt ræðu á borgarafundi í janúar í fyrra.