Vildi ekki hleypa slökkviliðsmönnum að eldsvoða

Slökkviliðið í Hafnarfirði var kallað út vegna eldsvoða á geymslusvæði í Hafnarfirði um klukkan sjö í kvöld. Það var vegfarandi sem tilkynnti um þykkan svartan reyk sem lagði frá svæðinu, sem er nálægt Álverinu í Straumsvík.

Þegar slökkviliðið kom á vettvang ætlaði starfsmaður á svæðinu ekki að hleypa slökkviliðinu inn á svæðið að sögn vakstjórans sem Vísir ræddi við.

Eftir nokkurt þóf komu slökkviliðsmenn starfsmanninum í skilning um að honum væri óheimilt að hindra störf slökkviliðsmannanna. Úr varð því að slökkviliðsmennirnir komust inn á vinnusvæðið að lokum.

Í ljós kom að eldur hafði kviknað í trefjum og spýtnabraki í gámi. Ekki var um mikinn eld að ræða og réði slökkviliðið niðurlögum eldsins án nokkurra vandkvæða. Skaðinn var með minnsta móti og lítil sem enginn hætta á ferð.

Eldsupptök eru óljós.