Deila enn um Eyjafjallajökul

Flugfélög víða um heim deila enn við þúsundir farþega sem strönduðu á flugvöllum þegar askan úr Eyjafjallajökli dreifðist um himinhvolfin í apríl.

Farþegarnir krefjast skaðabóta vegna hótelkostnaðar, dýrari flugmiða og fleira. Flugfélögin virðast mörg reyna hvað þau geta til að draga lappirnar í greiðslu skaðabóta og segjast nú þegar hafa greitt gríðarlegar fjárhæðir vegna þessa.

Hollenska flugfélagið KLM þykir standa sig einna verst í uppgjörinu eftir eldgosið. Reglur Evrópusambandsins kveða á um að farþegar skuli fá greiddan hótelkostnað og mat fyrir allan tímann sem þeir eru strand. KLM tók aftur á móti þá afstöðu að borga aðeins fyrir einn sólahring. Evrópusambandið hefur hótað flugfélaginu málsókn vegna þessa.

Flugfélögin kveinka sér og benda á að þau þurfi einnig að taka á sig mikið tap vegna eldgossins. Ryanair hætti til að mynda við um tíu þúsund flug og EasyJet ríflega sjö þúsund. Frá þessu var sagt á vef Guardian í gær.