Gáfu hálfa milljón til styrktar Haítí

Tónlistarmennirnir Arnar Már Friðriksson og Birgir Sævarsson, sem vöktu fyrst athygli í þættinum Bandið hans Bubba, söfnuðu rúmri hálfri milljón króna á styrktartónleikum sem þeir héldu á Nasa 20. janúar. Þar komu fram Páll Óskar Hjálmtýsson, Stefán Hilmarsson og fleiri kunnir tónlistarmenn og voru áheyrendur fjögur hundruð. Allur ágóðinn rennur til fórnarlamba jarðskjálftans á Haítí í gegnum Rauða krossinn og afhentu þeir félagar samtökunum ávísun með þeirri upphæð í gær.

„Við vissum ekki hverju við áttum von á. Þessir tónleikar voru skipulagðir á fimm sólarhringum. Miðað við að auglýsingar voru keyrðar í tvo daga og að þetta var fimm daga fyrirvari þá erum við mjög ánægðir með þessa upphæð,“ segir Arnar Már. Alls söfnuðust 451 þúsund á tónleikunum á Nasa og N1 bætti síðan við 100 þúsund krónum. „Ef tveir gæjar frá Íslandi ná hálfri milljón þá spyr maður sig hvað allur heimurinn gæti gert. Við Biggi erum rosalega stoltir af þessu.“

Þeir Arnar og Birgir feta þar með í fótspor heimsþekktra tónlistarmanna sem hafa lagt Haítí lið að undanförnu. Í Hollywood komu 75 stjörnur úr tónlistar- og kvikmyndaheiminum saman til að taka upp nýja útgáfu af laginu We Are The World sem kom upphaflega út árið 1985. Á meðal þeirra sem tóku þátt voru Pink, Santana, Celine Dion, Jeff Bridges, Vince Vaughn og Snoop Dogg. Allur ágóði lagsins rennur til fórnarlamba jarðskjálftans en það verður fyrst spilað á sjónvarpsstöðinni NBC 12. febrúar. - fb