Lífið

Aftur líf í Sirkushúsinu

Hörður Ágústsson telur sig vera að breiða út Mac-boðskapinn en Macland er eina verslunin í miðbænum sem sérhæfir sig í raftækjum.Fréttablaðið/Vilhelm
Hörður Ágústsson telur sig vera að breiða út Mac-boðskapinn en Macland er eina verslunin í miðbænum sem sérhæfir sig í raftækjum.Fréttablaðið/Vilhelm

Þrjú ár eru liðin síðan skemmtistaðnum Sirkus var lokað á Klapparstíg þar eð rífa átti húsið. Nú dúkkar þar upp verslun með tölvuvörur.

„Ég sagði upp vinnunni þremur vikum fyrir jól og hófst þá handa við að gera húsnæðið upp. Það var annað hvort að hrökkva eða stökkva,“ segir Hörður Ágústson, framkvæmdastjóri Macland, en hann er búinn að opna verslun á Klapparstíg 30 þar sem skemmtistaðurinn sálugi var til húsa.

Tæp þrjú ár eru síðan skemmtistaðnum var lokað vegna þess að til stóð að rífa húsið og hafa eflaust margir velt framtíð litla hússins á Klapparstíg fyrir sér, enda hefur það verið heldur grátt og guggið ásýndar. „Húsnæðið kom fyrir stuttu aftur á leigumarkaðinn og þá höfðu Hemmi og Valdi sem reka kaffihúsið hér fyrir ofan samband við mig en við eigum búðina til helminga.“

Macland er, eins og nafnið gefur til kynna, verslun sem sérhæfir sig í tölvum og tækjum tengdum Apple ásamt því að bjóða upp á viðgerðarþjónustu og sérfræðiaðstoð. „Ég er örugglega Apple-lúði aldarinnar og hef verið í um tíu ár svo það má kannski segja að ég hafi tekið að mér að breiða út boðskapinn,“ segir Hörður. Hann hefur rekið verslunina á netinu í tæp ár og var í raun ekki með neina stóra drauma varðandi fyrir­tækið en ákvað að taka stökkið þegar húsnæðið bauðst.

Hörður skrifaði undir leigusamning í byrjun desember og hafði þá hraðar hendur við endurbætur á húsnæðinu enda var takmarkið að opna fyrir jól. „Þetta er búið að vera mikið stress og við höfum átt margar svefnlausar nætur til að koma þessu heim og saman,“ segir Hörður en verslunin var opnuð í fyrradag og hefur verið reynt að tapa ekki tengingunni við Sirkusbarinn með endurbótunum.

„Við erum eina verslunin með raftæki í miðbænum og sérhæfum okkur í að gefa góða og persónulega þjónustu,“ segir Hörður og hlakkar til að takast á við verslunarbransann í miðbænum.
alfrun@frettabladid.is




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.