„Ég veit ekki alveg hvað ég geri núna“

„Þú segir mér fréttir, ég var bara að keyra dóttur mína í bíó, þetta eru merkileg tíðindi," segir Ásta Sigrún Helgadóttir, forstöðumaður Ráðgjafarstofu um fjármál heimilanna.

Hún var í hópi umsækjenda um embætti umboðsmanns skuldara.

Þegar blaðamaður hafði samband við hana nú fyrir stundu hafði hún ekki frétt af því að Runólfur Ágústsson hefði hætt sem umboðsmaður skuldara. Það gerði hann í Kastljósi í kvöld.

„Mér finnst mikilvægt að umboðsmaður skuldara sé trúanlegur og ekki með skuldahala á bakinu. Mér finnst þetta bara jákvætt og hans vegna líka." Aðspurð um hvort að hún muni sækja aftur um starfið ef það verður auglýst segir Ásta Sigrún: „Þú ert að segja mér svo miklar fréttir að ég er ekki búin að taka neina ákvörðun.Ég veit ekki alveg hvað ég geri núna. Ég þarf að gera upp minn hug, þetta er búið að vera mjög sérkennilegt allt saman. Ég var komin í það að leita réttar míns, en það breytist eflaust allt núna. Svona er Ísland í dag," segir Ásta Sigrún.