FÍB fagnar banni á innflutningi tjónabíla

Runólfur Ólafsson, framkvæmdastjóri Félags íslenskra bifreiðaeigenda, segir að þar á bæ fagni menn nýjum reglum sem banna innflutning á erlendum tjónabílum. „Við fögnum því að sett sé fyrir þennan leka sem verið hefur hér á landi í þessum málum. Það hafa verið töluverð brögð að því að hingað hafi verið fluttir inn bílar sem teljast vera ónýtir annars staðar," segir Runólfur.

Hann segir að nokkuð hafi verið um að fólk hafi lent í því að kaupa köttinn í sekknum. „Hingað til hefur verið hægt að flytja inn bíla sem skráðir eru ónýtir og síðan hefur eftirliti á viðgerðum verið ábótavant. Það getur boðið hættunni heim."

Runólfur segir ævintýramenn hafa verið að gera við bílana án þess að fara eftir settum reglum og í ákveðnum tilvikum hafi loftpúðar ekki verið settir aftur í bíla eftir að þeir hafa blásið út. „Það er því bara vel að tekið sé harðar á þessu því við höfum allt of mörg tilvik þar sem fólk hefur lent í vandræðum eftir að hafa keypt svona bíla."