Með 44 grömm af amfetamíni á leið í Herjólfsdal

Karlmaður um tvítugt var handtekinn Þjóðhátíð í Vestmannaeyjum í nótt með um 44 grömm af amfetamíni. Efnin eru talin ætluð til sölu og var hann yfirheyrður í kjölfarið. Annars gekk nóttin ágætlega að sögn lögreglu miðað við þann fjölda sem staddur er í Vestmannaeyjum, en hátt í 16 þúsund manns eru þegar komnir á Þjóðhátíð.

Heilt yfir má segja að nóttin hafi gengið vel á Þjóðhátíð í Vestmannaeyjum í nótt en eitthvað af fíkniefnum fundust hér og þar.

Að sögn Jóhannesar Ólafssonar yfirlögregluþjóns kom upp eitt stórt fíkniefnamál þegar karlmaður fæddur árið 1988 var stöðvaður með 44 grömm af amfetamíni á leið inn í Herjólfsdal. Það voru lögreglumenn sem uppgötvuðu fíkniefnin við hefðbundið eftirlit og var hann handtekinn og yfirheyrður í kjölfarið. Talið er að efnin hafi veirð ætluð til sölu.

Ein líkamsárásarkæra barst lögreglu eftir nóttina og einhverjir gistu fangageymslur, en á lögreglustöðinni eru sex fangaklefar. Engin nauðgunanarkæra hafði borist lögreglu í morgun en hátt í 16 þúsund manns eru nú á Þjóðhátíð og er búist við að enn bætist í í dag og á morgun.

Hátíðin var formlega sett í gær en meðal annars stigu á stokk Sólin frá Sandgerði, Björgvin Halldórsson, Svört föt og Veðurguðirnir.