Árni Johnsen: Þetta er ekkert flókið

„Nei, ég er aldrei spenntur maður, það er allt svo erfitt. Ég æfi ekki, ég keppi bara," segir Árni Johnsen kátur í samtali við fréttastofu nú fyrir stundu. Eins og venjan er á Þjóðhátíð mun Árni stjórna brekkusöngnum í kvöld.

Örlítil breyting verður á fyrirkomulaginu þetta árið því Árni mun ekki vera einn með sönginn. Samkvæmt Eyjafréttum munu þeir Jarl Sigurgeirsson og Sæþór Vídó aðstoða hannn, en þeir spila báðir með hljómsveitinni Tríkoti.

Árni var hress og í góðu skapi þegar að fréttastofa ræddi við hann fyrir stundu. Fréttamaður sagðist hafa frétt af því að hann yrði ekki einn í kvöld að stjórna brekkusöngnum. Árni svaraði honum um hæl: „Nei, ég held að við verðum eitthvað um tuttugu þúsund."

Árni segir að gott sé að fá liðsauka enda sé brekkusöngurinn einn stærsti viðburðurinn á þjóðhátíð. „Það fjölgar alltaf og fjölgar og þá getur verið skemmtilegt að styrkja hljóðið í þessu," segir Árni sem vill ekki segja frekar frá útsetningunni. „Þetta kemur allt í ljós, það þarf ekki að kvarta undan „sound-i" þegar við erum með tuttugu þúsund manna kór. Það er bara gaman að styrkja undirspilið aðeins."

Árni segist ætla að spila um 60 slagara í kvöld og einhverjir af þeim hafa ekki verið spilaðir áður. Hverjir eru það? „Ég segi ekki frá því, þetta vaknar bara í brekkunni. Þetta er ekkert flókið sko, við syngjum ekki eftir stafrófsröð frekar en við viljum deyja eftir stafrófsröð," segir Árni sprækur að lokum.

Brekkusöngurinn byrjar á slaginu klukkan 23 í kvöld og verður útvarpað í beinni útsendingu á RÁS 2.