Søren Langvad handhafi Verðlauna Jóns Sigurðssonar

Hátíð Jóns Sigurðssonar var haldin í Jónshúsi í Kaupmannhöfn í dag, sumardaginn fyrsta. Markmiðið með hátíðinni er að heiðra minningu Jóns Sigurðssonar og halda á loft verkum hans og hugsjónum. Stjórn húss Jóns Sigurðssonar hefur umsjón með hátíðinni með fulltingi forseta Alþingis og forsætisnefndar.

Ásta R. Jóhannesdóttir, forseti Alþingis, hélt hátíðarræðu í tilefni dagsins. Í ræðu sinni fjallaði hún meðal annars um eldsumbrotin í Eyjafjallajökli, skýrslu rannsóknarnefndar Alþingis og samband fullveldis og Evrópusambandsaðildar. Þá afhenti forseti Alþingis Verðlaun Jóns Sigurðssonar. Í ár hlaut Søren Langvad byggingarverkfræðingur, starfandi stjórnarformaður Pihl og Søn og einn stofnenda og fyrrverandi stjórnarformaður íslenska verktakafyrirtækisins Ístaks verðlaunin.

Í tilkynningu frá Alþingi segir að Søren hafi stutt dyggilega við útbreiðslu íslenskrar menningar á danskri grund og unnið óeigingjarnt starf í þágu Íslendinga í Kaupmannahöfn, meðal annars sem formaður Dansk-islandsk samfund. Søren hafi verið ötull talsmaður íslenskra hagsmuna og hafi með ævistarfi sínu eflt vináttu milli Íslands og Danmerkur.

Alþingi veitir Verðlaun Jóns Sigurðssonar forseta í minningu starfa hans í þágu Íslands og Íslendinga. Þau hlýtur hverju sinni einstaklingur sem hefur unnið verk er tengjast hugsjónum og störfum Jóns Sigurðssonar. Þessi verk geta verið á sviði fræðistarfa, viðskipta eða mennta- og menningarmála.