Ótrúlega góð viðbrögð - myndir

„Við vorum báðar að sinna öðru þegar ævintýrið byrjaði," útskýra Vilborg Aldís Ragnarsdóttir, sem var sölustjóri, og Hafdís Heiðarsdóttir, sem þá var í fæðingarorlofi, spurðar út í hönnunarfyrirtækið þeirra Arcadesign.

„Í dag erum við að vinna á fullu í Arca og erum að leggja drög að því að koma vörunum okkar á erlendan markað. Viðbrögðin hafa verið ótrúlega góð."

„Ævintýrið hófst síðastliðið vor þegar við sátum yfir kaffibolla í eldhúsinu hjá Vilborgu sem var að fara að ferma frumburðinn."

„Talið barst að borðbúnaði og að það vantaði eitthvað sniðugt og smart sem tæki ekki allt skápaplássið hjá manni."

„Upp frá því fóru hugmyndirnar að fæðast hver af annarri og áður en við vissum af þá vorum við komnar með fyrstu línuna, Alfa, sem saman stendur af kökudisk á fæti, þrískiptum stöndum, brauðtertudisk, servíettustandi og kertastjökum. Sérstæðan við línuna er að alla hluti er hægt að taka í sundur," útskýra þær.

„Í tilefni nýju línunnar, Corvuz, verðum við með opið hús í dag klukkan 17:00 í Modern, Hlíðasmára 1 í Kópavogi og það eru allir velkomnir," segja þær áður en kvatt er.

Í myndasafni má sjá nýju línuna þeirra.