Celine Dion snýr aftur á svið í Vegas

Söngkonan stórkostlega Celine Dion snýr aftur á svið í Las Vegas á næsta ári. Dion hefur gert þriggja ára samning við Ceasars Palace hótelið og sögusagnir eru um að hún fái 100 milljónir dollara greidda fyrir ómakið.

Salurinn sem Dion kemur fram í var upprunalega byggður yfir hana, en hún söng þar á árunum 2003 til 2007. Sýning hennar var gríðarlega farsæl, en þegar hún hætti tók kjarnakonan Bette Midler við. Henni gekk hins vegar ekki jafn vel sem varð til þess að leitað var til Dion á ný.

Rene Anelil, umboðsmaður og eiginmaður Celine Dion, segist vera gríðarlega ánægður með að spúsan sé að snúa aftur til Las Vegas. „Stundaskráin verður mannúðleg svo að Celine ofþreytist ekki,“ sagði hann. „En sýningin verður jafn glæsileg og sú fyrsta!“