Sætir strákar í regnbogalitum

„Þetta verður flott sýning. Ég hvet alla til að mæta,“ segir ljósmyndarinn og myndlistarmaðurinn Oddvar Örn Hjartarson sem opnar sýningu í Ljósmyndasafni Reykjavíkur á föstudagskvöld. „Þetta eru konsept-verk. Ég verð með tvær nýjar seríur og gamalt efni sem mun rúlla á myndvarpa. En allt hitt er prentað og rosafínt.“

Annað nýja verkið heitir IKAE og á hugmyndafræðilegar rætur til svokallaðra IKEA-mynda, sem Oddvar setur í glænýtt samhengi. „Þetta eru sex myndir þar sem ég er að leika mér með nafnið IKEA. Þessar myndir eru mjög heimilisvænar og fallegar og líka einfaldar,“ segir Oddvar. Hitt verkið nefnist Da Boyz og er myndröð af strákum þar sem regnbogalitir samkynhneigðra birtast í nýjum formum. „Þetta er verkefni sem ég gerði þegar ég var í ljósmyndaskóla í Danmörku. Þá fór ég út á götu og ákvað að yfirstíga óttann og tala við sæta stráka til að pikka í myndatöku. Af sautján sem ég spurði voru tólf sem voru til í að vera með.“

Oddvar er líklega þekktastur fyrir myndir sínar af Páli Óskari Hjálmtýssyni, sem hafa birst bæði í Silfursafninu og dagatali sem hann gerði fyrir aðdáendur sína. Þær myndir munu einmitt birtast á myndvarpanum á sýningunni. „Það er æðislegt að mynda Palla, við erum svo góðir vinir,“ segir Oddvar. - fb