Sjálfstæðismenn bæta við sig - vinsældir stjórnarinnar dala

Sjálfstæðisflokkurinn mælist nú með 35% fylgi samkvæmt nýrri könnun Capacent sem birt var í dag. Fylgi flokksins í júlímánuði er tveimur prósentustigum meira en var í júní og hefur það ekki mælst eins hátt síðan í apríl 2008. Fylgi VG minnkar að sama skapi um tvö prósentustig og er nú 19%. Fylgi annarra flokka breytist lítið milli mánaða, liðlega 24% segjast ætla að kjósa Samfylkinguna, Framsóknarflokkurinn mælist með 12% og Hreyfingin tæplega 4%. Um sex prósent myndu kjósa aðra flokka og þar af mælist Borgarahreyfingin með 2% og Besti flokkurinn einnig.

„Rúmlega 11% svarenda taka ekki afstöðu eða neita að gefa hana upp og næstum 17% segjast myndu skila auðu eða ekki kjósa ef kosningar færu fram í dag. Hlutfall þeirra sem tekur afstöðu er svipað og í október 2008 strax eftir hrun. Hlutfall þeirra sem segjast myndu skila auðu eða ekki kjósa er hærra en áður hefur mælst," segir á vef Capacent.

Vinsældir ríkisstjórnarinnar dala áfram

Capacent kannaði einnig stuðning manna við ríkisstjórnina og minnkar hann þriðja mánuðinn í röð og mælist nú 38%. „Þetta er minnsti stuðningur við ríkisstjórn þessara tveggja flokka frá myndun minnihlutastjórnarinnar í febrúar 2009."

Konur styðja ríkisstjórnina í meiri mæli en karlar en 42% þeirra styðja stjórnina á meðan stuðningur karla mælist um 34%. „Stuðningur við ríkisstjórnina er minnstur meðal þeirra sem hafa fjölskyldutekjur sem eru milljón eða hærri og mælist stuðningur við stjórnina 34% hjá þessum tekjuhópi. Stuðningur við ríkisstjórnina eykst með aukinni menntun og mælist stuðningur við ríkisstjórnina einungis 29% hjá þeim sem hafa eingöngu grunnskólapróf samanborið við 47% stuðning hjá þeim sem hafa lokið háskólaprófi."

Nánar má kynna sér könnunina á heimasíðu Capacent.