Sigldi til Íslands á ónýtum dópdalli og til baka með Norrænu

Einn Hollendingurinn af þremur, sem voru handteknir við komuna til Seyðisfjarðar fyrir um tveimur vikum síðan grunaðir um aðild að fíkniefnasmygli, er farinn úr landi.

Mennirnir komu til Seyðisfjarðar á hálfónýtum dalli sem lögregluna grunar að hafi verið notaður til þess að smygla um þremur tonnum af kannabisi til Hollands.

Málið er í rannsókn í Hollandi en lögreglan hér á landi aðstoðar lögregluyfirvöld þar í landi.

Mennirnir sögðust vera á leiðinni til Grænlands. Þeir voru handteknir við komuna til landsins en síðan sleppt lausum.

Fjórir menn eru í haldi lögreglunnar í Hollandi grunaðir um aðild að smyglinu.

Hollendingurinn fór af landi brott í vikunni með Norrænu á Seyðisfirði. Hinir tveir eru enn á landinu að sögn Karls Steinars Valssonar, yfirmanns fíkniefnadeildar lögreglunnar á höfuðborgarsvæðinu.

Rannsóknin er í eðlilegum farvegi að sögn Karls Steinars.