Dópdallur settur í farbann

Skip, sem grunur leikur á að hafi verið notað til þess að smygla um þremur tonnum af kannabis til Hollands, hefur verið sett í farbann.

Samkvæmt tilkynningu á heimasíðu Siglingastofnunarinnar þá heitir skiptið Helen Guard. Það var sett í farbann þann 19. maí en ástæðan er ástand skipsins og öryggisbúnaðar auk þess að ekki tókst að framvísa neinum skírteinum.

Samkvæmt gögnum sem fundust um borð er skipið 100 brúttótonn og rétt rúmir 21 metrar að skráningarlengd, smíðað árið 1968 í Þýskalandi og skráð þar þar til það var afskráð árið 2002. Þótt skipið sé merkt Kingstown fundust ekki gögn um borð því til staðfestingar.

Farbannið verður í gildi þar til lögmætum gögnum hefur verið framvísað og úrbætur gerðar á skipi og búnaði.

Það voru þrír Hollendingar sem komu á skipinu til landsins. Skipið er mjög illa farið en þeir sögðust vera á leiðinni til Grænlands. Mennirnir voru hinsvegar handteknir vegna gruns um að hafa notað skipið til þess að smygla gríðarlegu magni af kannabis til Hollands.

Fjórir menn eru í haldi lögreglunnar í Hollandi. Einn Hollendingur hefur yfirgefið landið en hinir tveir ganga um frjálsir. Lögreglan á Íslandi aðstoðar yfirvöld í Hollandi vegna málsins.