Engin eldsumbrot en nokkuð um svifryk

Gosið liggur niðri samkvæmt stöðumati almannavarna en þó er nokkuð um svifryksmengun á svæðinu. Á Hvolsvelli hafa loftgæði verið góð síðan á föstudaginn en veðrið hefur verið hæglátt. Ekkert öskufall hefur átt sér stað á svæðinu á þessum tíma.

Svifryksmælingar hafa því sýnt gildi undir heilsuverndarmörkum. Svipaða sögu má segja af Heimalandi en þar voru gildin einnig vel undir heilsuverndarmörkum þessa daga.

Á Vík í Mýrdal voru loftgæði hinsvegar ekki eins góð dagana 21. til 22. maí og flokkast sem sæmileg. Einn toppur var aðfaranótt 21. maí milli klukkan 1 og 3 en eftir það voru loftgæðin góð fram undir hádegi. Þá fóru gildin aðeins að hækka og héldust þannig út daginn.

Á laugardaginn síðasta kom hár toppur um hádegisbilið en hann hefur verið vegna foks á ösku. Þegar askan þornar og vind hreyfir má eiga von á hækkun gilda þegar askan fer að fjúka upp.

Á sunnudaginn, 23. maí, voru loftgæði ágæt fram til klukkan hálf-tíu um morguninn en þá hækkuðu gildin og voru yfir heilsuverndarmörkum út daginn.

Pása hefur verið á eldsumbrotum í Eyjafjallajökli síðan á laugardag og ekki er búist við öskufalli á meðan. Hinsvegar er alltaf von á að aska sem þornar geti hafist á loft með vindi og roki sem getur leitt til verri loftgæða.