Fámenn mótmæli fyrir utan stjórnarráðið

Um fimmtíu mótmælendur mótmæltu fyrir utan stjórnarráðið á meðan ríkisstjórnarfundur fór fram þar innandyra í morgun. Mótmælin eru á vegum Heimavarnarliðsins sem eru samtök sem mótmæla uppboðum á heimilum.

Meðal þess sem Heimavarnarliðið mótmælir er meint sjálfdæmi fjármálastofnanna við skuldauppgjör og eignaupptöku þeirra á heimilum landsmanna.

Svo segir orðrétt í tilkynningu frá samtökunum: „Við sættum okkur ekki við að heimilum okkar og velferð verði fórnað á altari fjárglæframanna. Við neitum alfarið að samþykkja að uppboð og nauðungarsölur heimila verði teknar upp

að nýju, án þess að íbúðalán verði leiðrétt aftur fyrir hrun. Næg er eignaupptakan fyrir."

Mótmælin hafa farið friðsamlega fram.