Ákvörðun tekin innan skamms

Tekin verður ákvörðun fyrir klukkan fjögur í dag hvort óskað verði eftir áframhaldandi gæsluvarðhaldi yfir Magnúsi Guðmundssyni, fyrrverandi forstjóra Kaupþings í Lúxemborg. Hann hefur ásamt öðrum fyrrverandi starfsmönnum Kaupþings verið yfirheyrður í morgun.

Gæsluvarðhaldið yfir Magnúsi Guðmundssyni, fyrrverandi forstjóra Kaupþings í Lúxemborg, rennur út klukkan fjögur í dag. Magnús var handtekinn á fimmtudag í síðustu viku og úrskurðaður í sjö daga gæsluvarðhald daginn eftir. Samkvæmt heimildum fréttastofu hefur Magnús verið yfirheyrður í dag og standa yfirheyrslur enn yfir. Tekin verður ákvörðun um hvort krafist verði áframhaldandi gæsluvarðhalds eða farbanns fyrir klukkan fjögur. Þá hafa tveir aðrir fyrrverandi starfsmenn Kaupþings einnig verið í yfirheyrslum í morgun. Alls hafa hátt í þrjátíu fyrrverandi starfsmenn verið yfirheyrðir síðustu daga en um tuttugu hafa stöðu grunaðra í rannsókn málsins.

Gæsluvarðhald yfir þeim Hreiðari Má Sigurðssyni og Ingólfi Helgasyni, fyrrverandi forstjórum Kaupþings, rennur út í næstu viku.

Sigurður Einarsson, fyrrverandi stjórnarformaður Kaupþings, sem nú er eftirlýstur af Interpol, hefur ekki enn svarað kalli sérstaks saksóknara að koma í yfirheyrslur. Samkvæmt breska blaðinu Telegraph hefur Sigurður ráðið sér lögmanninn Ian Burton. Sá er vel þekktur verjandi í stórum fjársvikamálum. Meðal skjólstæðinga Burtons eru aðalsfólk, þingmenn, íþróttastjörnur og frægt fólk, m.a. söngkonan Amy Winehouse.

Burton segir í samtali við blaðið að Sigurður sé tilbúinn að koma til Íslands í yfirheyrslur með því skilyrði að hann verði ekki handtekinn við komuna til landsins.