Tuttugu tóku þátt í hópslagsmálum

Lögreglan á höfuðborgarsvæðinu var kölluð út rétt eftir klukkan fimm í dag vegna hópslagsmála í Hafnarstræti. Þar tókust á tveir hópar sem í voru um 20 unglingsstrákar á aldrinum 14-16 ára. Sumir þeirra voru vopnaðir bareflum og þá var einn með rafstuðtæki, en slík tæki eru ólögleg hér á landi. Hópunum laust saman vegna skeytasendinga í gegnum internetið.

Einn unglingsdrengjanna þurfti að leita sér aðstoðar á slysadeild en hann er ekki alvarlega slasaður, að sögn varðstjóra hjá lögreglunni. Einn var handtekinn á staðnum og færður á lögreglustöðina við Hverfisgötu. Í framhaldinu voru tveir boðaðir til yfirheyrslu ásamt foreldrum sínum. Fyrir skömmu voru tveir unglingsdrengir til viðbótar boðaðir á lögreglustöðina.

Vegna ungs aldurs tilkynnist málið sjálfkrafa til barnaverndaryfirvalda. Þeir sem eru eldri en 15 ára eru þó sakhæfir. Að sögn varðstjóra hafa nú þegar verið settar upp fimm kærur fyrir brot á vopnlögum og vegna líkamsárásar.