Ríkisstjórn Frakklands má ekki skipta sér af landsliðinu

Alþjóða knattspyrnusambandið, FIFA, hefur sett sig í samband við íþróttamálaráðherra Frakklands og minnt hana á að skipta sér ekki af málefnum franska landsliðsins í knattspyrnu.

Roselyne Bachelot íþróttamálaráðherra lét hafa eftir sér á dögunum að franska ríkisstjórnin yrði að skipta sér af málefnum landsliðsins eftir að allt sprakk í loft upp á HM.

Reglur FIFA segja aftur á móti að ríkisstjórnir megi ekki skipta sér af málefnum knattspyrnusambanda og því hefur FIFA beðið ráðherrann um að ganga ekki of langt í afskiptum sínum.