Neitar því að hafa hvatt Unni til að hafna kaupum Magma

Sveinn Margeirsson, doktor í iðnaðarverkfræði, hafnar því að hafa hvatt Unni G. Kristjánsdóttur um að hafna kaupum Magma í HS Orku, enda hafi nefnd um erlenda fjárfestingu verið löngu búin að taka ákvörðun þegar samtal þeirra átti sér stað, en þetta var meðal þess sem réð því að forsætisráðherra vildi ekki skipa Svein í nefnd sem rannsaka á kaup Magma á HS Orku.

Sveinn segir í greinargerð sinni að afar hæpnar forsendur búi að baki ákvörðun ráðuneytisins og vandséð sé ferlið sé til þess fallið að auka traust á starfi nefndarinnar.

Fram hefur komið í fjölmiðlum að Unnur G. Kristjánsdóttir, formaður nefndar um erlenda fjárfestingu, hafi látið forsætisráðuneytið vita af samtali hennar og Sveins Margeirssonar, sem er systursonur eiginmanns hennar, þar sem hann hafi hvatt hana, sem formann nefndar um erlenda fjárfestingu, til staðfesta ekki kaup Magma á HS Orku. Sveinn segir þetta alrangt, því nefnd um erlenda fjárfestingu hafði þegar tekið ákvörðun í málinu þegar samtal þeirra átti sér stað, en nefndin tók ákvörðun sína í mars síðastliðnum. Þá segir hann Unni fara rangt með tíma samtalsins í tölvupósti til forsætisráðuneytisins, það hafi ekki verið í vor heldur hinn 9. júlí síðastliðinn.

Í greinargerð Sveins til forsætisráðuneytisins, sem fréttastofa hefur undir höndum, segist hann hafa hringt í Unni til að heyra frá henni sjálfri hvaða forsendur hefðu legið til grundvallar þegar nefnd um erlenda fjárfestingu tók ákvörðun um að heimila Magma Energy kaup á hlutafé í HS Orku. Unnur hafi þá tjáð honum að fimm lögfræðiálit hefðu legið til grundvallar ákvörðun nefndarinnar, en tvö þeirra hefðu verið þess efnis að hafna bæri kaupunum. Hann segist þá hafa lýst þeirri skoðun sinni að nefndin hefði byggt ákvörðun sína á hæpnum forsendum enda lægi fyrir lagalegur ágreiningur um málið og enginn nefndarmanna væri lögfræðimenntaður. Og sagðist hann því hafa lýst þeirri skoðun sinni að eftirláta ætti dómstólum að skera úr um málið, þar sem ágreiningur væri um lögmætið.

Jóhanna Sigurðardóttir, forsætisráðherra, vék sérstaklega að þessu samtali Sveins og Unnar á blaðamannnafundi ríkisstjórnarinnar í gær og sagði að það hefði skipt máli þegar seta hans í nefndinni var ekki staðfest. Endanleg ákvörðun um að staðfesta ekki skipun hans í nefndinni var þó tekin á þeim grundvelli að hann væri venslamaður Unnar, í samræmi við minnisblað lektors í stjórnsýslurétti, en ekki á þeirri forsendu að hann hefði lýst skoðunum sínum á málinu.