Margrét talar fyrir VG

Margrét Pétursdóttir, varaþingmaður Vinstri grænna, mun vera einn ræðumanna í almennum stjórnmálaumræðum eða svokölluðum eldhúsdagsumræðum á Alþingi í kvöld. Margrét tók sæti á Alþingi í lok apríl þegar Guðfríður Lilja Grétarsdóttir fór í fæðingarorlof. Auk hennar er þrír flokksformenn og einn ráðherra meðal ræðumanna.

Umræðurnar fara þannig fram að hver þingflokkur fær 22 mínútur til umráða sem skiptast í þrjár umferðir, 10 mínútur í fyrstu umferð, 6 mínútur í annarri og 6 mínútur í síðustu umferð. Þingmaður utan flokka talar síðastur í fyrstu umferð og hefur 6 mínútur.

Umræðurnar verða sendar út í útvarpi og sjónvarpi klukkan 21.

Röð flokkanna verður þessi í öllum umferðum:

Sjálfstæðisflokkur,

Samfylkingin,

Framsóknarflokkur,

Vinstri hreyfingin - grænt framboð og

Hreyfingin.

Ræðumenn flokkanna verða:

Fyrir Sjálfstæðisflokk tala í fyrstu umferð Bjarni Benediktsson, 2. þm. Suðvesturkjördæmis, í annarri Einar K. Guðfinnsson, 5. þm. Norðvesturkjördæmis, en í þeirri þriðju Unnur Brá Konráðsdóttir, 6. þm. Suðurkjördæmis.

Ræðumenn Samfylkingarinnar eru: Þórunn Sveinbjarnardóttir, 7. þm. Suðvesturkjördæmis, í fyrstu umferð, Sigríður Ingibjörg Ingadóttir, 4. þm. Reykjavíkurkjördæmis suður í annarri, en í þriðju umferð Róbert Marshall, 8. þm. Suðurkjördæmis.

Fyrir Framsóknarflokk tala Sigmundur Davíð Gunnlaugsson, 8. þm. Reykjavíkurkjördæmis norður, í fyrstu umferð, Eygló Harðardóttir, 7. þm. Suðurkjördæmis, í annarri, en í þriðju umferð Gunnar Bragi Sveinsson, 4. þm. Norðvesturkjördæmis.

Fyrir Vinstri hreyfinguna - grænt framboð tala í fyrstu umferð Steingrímur J. Sigfússon fjármálaráðherra, í annarri Lilja Rafney Magnúsdóttir, 6. þm. Norðvesturkjördæmis, en Margrét Pétursdóttir, 3. þm. Suðvesturkjördæmis, í þriðju umferð.

Fyrir Hreyfinguna tala í fyrstu umferð, Birgitta Jónsdóttir, 9. þm. Reykjavíkurkjördæmis suður, og í annarri umferð Margrét Tryggvadóttir, 10. þm. Suðurkjördæmis.

Ræðumaður utan flokka Þráinn Bertelsson, 9. þm. Reykjavíkurkjördæmis norður, talar í fyrstu umferð.