Ágúst tekur upp auglýsingu með sjálfum Messi

„Ég átti að fara frá Gatwick um morguninn en þar var allt lokað. Ég náði svo einni af síðustu vélunum frá Heathrow. Flugmaðurinn sagði að við hefðum rétt svo sloppið," segir Ágúst Jakobsson kvikmyndagerðarmaður.

Ágúst býr í London og náði með herkjum að komast til Barcelona í gær áður en flugumferð stöðvaðist vegna öskufalls frá eldgosinu í Eyjafjallajökli. Ástæða fararinnar er sú að Ágúst er að fara að taka upp auglýsingu með Lionel Messi, besta knattspyrnumanni heims.

„Þetta er auglýsing fyrir kínverskt fjármálafyrirtæki. Ég verð með honum á æfingavelli Barcelona og svo verður framhaldið af auglýsingunni klárað í Peking. Þetta verður nú auðveldur dagur fyrir Messi, hann mætir til mín eftir æfingu og fær að halda boltanum á lofti og leika sér aðeins," segir Ágúst.

Ekki mátti miklu muna að Ágúst yrði af þessu draumaverkefni vegna eldgossins á Íslandi. Hann viðurkennir að það hafi verið nokkuð sérstök stund þegar hann kom í flugstöðina í gærmorgun.

„Ég trúði þessu ekki þegar ég labbaði inn á Gatwick og sá að allt flug lá niðri vegna eldgoss á Íslandi. Þarna stóð ég í 66°norður úlpunni minni með fánann á erminni og var að spá í hvort ég ætti að fela fánann."

Ágúst er mikill fótboltaáhugamaður og hefur sem slíkur notið þeirra forréttinda að fá að vinna með mörgum af þekktustu knattspyrnumönnum heims. Hann hefur gert auglýsingar með Ronaldo, Ronaldinho, Zlatan Ibrahimovich og fleirum og fyrir skemmstu gerði hann 3D-auglýsingu fyrir Samsung þar sem nokkrar hetjur úr Chelsea voru í aðalhlutverki. Svo skemmtilega vill til að Ágúst er harður stuðningsmaður Chelsea í enska boltanum. Kvikmyndatökumaðurinn viðurkennir þó að Messi beri höfuð og herðar yfir aðra fótboltamenn í dag.

„Hann er ótrúlegasti knattspyrnumaður í heimi. Hann er bara frá annarri plánetu."

Aðspurður viðurkennir Ágúst að það geti vissulega verið svolítið sérstakt að vinna með þessum þekktu köppum.

„Já, þetta er oft svolítið skrítið. Um daginn var ég að vinna með öllum Chelsea-gaurunum og daginn eftir var ég kominn á Stamford Bridge til að horfa á leik með þeim. Mig langaði bara að fara niður og heilsa upp á þá aftur."

hdm@frettabladid.is