Stefnt á að ljúka málinu í dag

Stjórnarfrumvarp um þjóðaratkvæðagreiðslu vegna synjunar forseta verður tekið til meðferðar á Alþingi í dag. Málið verður lagt fram á þingfundi, sem hefst klukkan hálf ellefu, og er stefnt að því að lögfesta það áður en dagur er að kveldi kominn.

Upphaflega var áformað að þinghald að loknu jólaleyfi hæfist þriðjudaginn 26. janúar.

Undanfarinn rúman áratug hefur þing á nýju ári jafnan hafist í annarri eða þriðju viku ársins. Á því var undantekning 1999 þegar þing kom saman 6. janúar til að bregðast, með lagasetningu, við Valdimarsdómnum.- bþs