Sagðir skýla óstjórn með bankahruni

Bæjarfulltrúar Sjálfstæðisflokks í Hafnarfirði segja meirihluta Samfylkingarinnar hafa stundað glannalega fjármálastjórn og það sjáist glögglega í fjárhagsáætlun næsta árs.

„Eftir fall bankanna fyrir rúmu ári hefur Samfylkingin, þrátt fyrir traustan meirihluta, ekki treyst sér til að fara í hagræðingu nema hafa fulltrúa minnihlutaflokkanna með í ráðum. Samfylkingin reynir einnig að skýla sér bak við bankakreppuna sem orsök fjárhagsvanda Hafnarfjarðarbæjar nú. Sannleikurinn er hins vegar sá, að hér í Hafnarfirði fór meirihlutinn offari í framkvæmdum og útgjöldum og jók stöðugt skuldasöfnun til að halda uppi of háu framkvæmdastigi á þenslutímum,“ segir í bókun sjálfstæðismanna við afgreiðslu fjárhagsáætlunarinnar.

Sjálfstæðismenn benda meðal annars á að frá því að Samfylkingin tók við stjórninni í Hafnarfirði árið 2002 hafi skuldir bæjarins nær þrefaldast. Skuldir og skuldbindingar séu nú 37 milljarðar króna eða 1,4 milljónir á hvern íbúa. Að meðaltali nemi skuldir á íbúa í sveitarfélögum landsins hins vegar 700 þúsund krónum. „Hafnarfjörður er orðið eitt skuldsettasta sveitarfélag landsins og sendi eftirlitsnefnd sveitarfélaga bréf í október síðastliðinn þar sem óskað er upplýsinga og skýringa hvernig brugðist verði við erfiðri fjárhagsstöðu Hafnarfjarðarbæjar.

Ein verstu mistök sem gerð hafa verið í fjármálastjórn bæjarins voru þegar Samfylkingin gekk ekki að tillögu Sjálfstæðisflokksins í september 2007 um að selja hlut Hafnarfjarðar í Hitaveitu Suðurnesja þá þegar. Ef Samfylkingin hefði ekki verið haldin ákvarðanafælni væru skuldir bæjarins um 15 milljörðum króna lægri. Þess í stað fóru þeir peningar sem Orkuveitan greiddi nú í desember í að greiða yfirdrátt hjá banka og einnig viðskiptaskuldir sem stofnað var til á árinu.“

Samkvæmt fjárhagsáætluninni á reksturinn eftir fjármagnsliði að verða jákvæður um 247 milljónir króna á árinu 2010. Gert er ráð fyrir því að útkoman fyrir árið 2009 verði hins vegar neikvæð um 1.552 milljónir sem meirihluti Samfylkingarinnar segir vera vegna óhagstæðra gengis- og verðlagsbreytinga. „Sjálfstæðisflokkurinn í Hafnarfirði ætti að líta í sinn eigin rann þegar kemur að umræðu um skuldamál og ábyrga efnahagsstjórn umliðins áratugar og hvar höfuðábyrgð á efnahagshruni þjóðarinnar liggur. Nýlegar yfirlýsingar formanns flokksins þeirra um mistök, valdaþreytu og ábyrgð tala þar skýrustu máli,“ sögðu Samfylkingarmenn í bókun. gar@frettabladid.is