Íslensk kona syngur hlutverk Hans

Íslensk mezzosópran, Dóra Ármannsdóttir, syngur eitt aðalhlutverkið í uppfærslu á óperunni Hans og Grétu sem verður frumsýnt á vegum Pacific Opera í Sidney í Ástralíu á morgun. Dóra segir að alls verði fjórar sýningar á sívinsælu verki Engelbert Humperdinck.

„Þetta er náttúrlega bara ævintýrið um Hans og Grétu sem flestir þekkja. Nema hvað þetta er skrifað á þýsku og við syngjum þetta á ensku," segir Dóra. Hún segir að um mikilvægt tækifæri sé að ræða fyrir sig enda sé leikhúsið góður stökkpallur fyrir unga söngvara sem séu að sækjast eftir reynslu.

Dóra er búin að vera í tæpt ár í Ástralíu með sambýlismanni sínum, en þau búa í úthverfi Sidney. Hún segir aðdragandann að því að þau fluttu út hafa verið þann að manninum sínum hafi boðist starf þar ytra og hún ákveðið að fylgja honum. „Ég vissi svo sem ekkert hvað beið mín hér en ákvað bara að þetta yrði gott," segir Dóra. Það hafi líka komið á daginn því lífið sé frábært í Sidney.

„Þetta er náttúrlega bara allt á hvolfi hérna," segir Dóra og bendir á að nú þegar hásumar sé á Íslandi sé miður vetur hjá sér. „En ég get ekki sagt að þetta sé mjög harður vetur," segir Dóra og bendir á að hitinn geti farið niður í 8 gráður. Það geti hins vegar verið býsna kalt inni í húsunum því þau séu mörg hver illa einangruð. Hún segir að það verði síðan heitt í kringum jólin. „Aðeins of heitt fyrir minn smekk," segir Dóra sem bendir á að hitinn geti farið allt upp í 35 gráður í desember.