Skipa hæstaréttardómara fyrir mánaðamót

Stefnt er að því skipa nýjan hæstaréttardómara áður en Hæstiréttur tekur til starfa að nýju um næstu mánaðamót. Hjördís Björk Hákonardóttir hæstaréttardómari lét af störfum um helgina og matsnefnd metur núna hæfni þeirra fjögurra umsækjenda sem sóttu um stöðu hennar.

Ása Ólafsdóttir, aðstoðarmaður dómsmálaráðherra, segir að nefndin hafi sex vikur til þess að ljúka störfum. „En ég lét kanna þetta hjá nefndinni og þeir eru að vinna eins hratt og þeir geta og vonandi að þeir ljúki því í þessum mánuði," segir Ása Ólafsdóttir. Hún tekur því fram að ekkert sé öruggt í þessum efnum. Nefndin starfi sjálfstætt undir forystu Páls Hreinssonar.

Samkvæmt lögum um Hæstarétt er dómurinn skipaður níu dómurum, en þeir verða þó einungis átta þangað til að búið er að skipa í stöðu Hjördísar.