Sömu mælikvarðar verði notaðir um alla í nefndinni

Það er eðlilegt að hæfi allra í nefnd forsætisráðherra um Magma-málið séu metin út frá sömu mælikvörðum, segja heimildarmenn fréttastofu, sérfræðingar í stjórnsýslunni sem ekki vilja láta nafns síns getið. Sveinn Margeirsson tekur ekki sæti í nefndinni vegna vanhæfis.

Forsætisráðuneytið hefur birt á vefsíðu sinni minnisblað, þar sem fjallað er um hæfi Sveins, til þess að setjast í nefnd forsætisráðherra um kaup Magma Energy Sweden AB á eignarhluta í HS orku, og fjalla jafnframt um starfsumhverfi orkugeirans hér á landi.

Fram kemur í minnisblaðinu að Unnur Kristjánsdóttir, formaður nefndar um erlenda fjárfestingu, sem fallist hefur á kaupin, hafi bent ráðuneytinu á að hún væri tengd Sveini. Enn fremur hefði hann lýst þeirri skoðun sinni í einkasamtali, að hafna ætti kaupunum.

Forsætisráðuneytið segir verkefni nefndar sinnar að skila hlutlausri greinargerð um fjárfestingu Magma frá Svíþjóð. Ráðuneytið segist telja málefnalegt að miða við hæfisreglur stjórnsýslulaga um setu í nefndinni, enda þótt ekki sé skylda til þess; Vísað er til hagsmuna og væntinga viðskiptaaðila sem um sé að ræða, og einnig trausts almennings á stjórnsýslunni. Umtalsverðir hagsmunir séu undir.

Í stuttu máli er Sveinn Margeirsson talinn vanhæfur til að sitja í nefndinni vegna vensla við Unni Kristjánsdóttir. Ummæli hans komi því ekki til skoðunar. Bent er á í forystugrein á vefritinu Smugunni, að Bjarnveig Eiríksdóttir, sérfræðingur í Evrópurétti við Háskóla Íslands, sem einnig hefur verið skipuð í nefndinni hafi sagt í viðtali við Ríkisútvarpið um miðjan júlí, að hún fái ekki séð hvaða regla sé brotin með því að leyfa Magma að kaupa hlut eða Magma í Svíþjóð að kaupa hlut í íslensku fyrirtæki.

Heimildarmenn fréttastofu, benda á að meta eigi hæfi nefndarmanna út frá sömu mælikvörðum. Ekki sé hægt að velja einstakar greinar stjórnsýslulaga og meta hæfi einstakra nefndarmanna út frá þeim.

Rétt kynni að vera, í tilviki Bjarnveigar, að kanna ummæli hennar nánar, en þó meðal annars með tilliti til tjáningarfrelsisákvæða stjórnarskrár, enn fremur með tilliti til þess hvernig hún hafi verið spurð í viðtalinu við Ríkisútvarpið, hvort svar hennar hefði verið sett fram með fyrirvörum og hvort svarið lýsi hlutlausri afstöðu til máls eður ei.