Actavis okrar á samheitalyfjum

Lausleg könnun á nokkrum algengum samheitalyfjum sem tekin voru af markaði af Actavis og sett aftur á markað undir öðrum heitum sýnir að sjúklingar á Íslandi greiða margfalt hærra verð fyrir sömu vöru undir nýjum merkjum.

Sveinn Rúnar Hauksson, heimilislæknir, segir að lyfjafyrirtækið Actavis hafi reglulega tekið lyf úr sölu án nokkurra skýringa sem hafi valdið sjúklingum miklum óþægindum. Hann segir að fyrirtækið hljóti að láta gróðasjónarmið ráða för, hætti að selja lyf sem skili litlum gróða og skeyti þannig ekki um hagsmuni sjúklinga.

Nýlegt dæmi er malaríulyfið kínín, sem meðal annars hefur verið notað til að meðhöndla fótakrampa, var tekið af markaði eftir að framleiðslu þess var hætt hér á landi og voru sjúklingar með fótakrampa án þess í tvo mánuði. Þetta olli þeim eðlilega miklum óþægindum. Lyfið er nú komið aftur á markað undir nýju heiti en á hærra verði. Og dæmin eru fleiri.

Eins og sést á töflunni kostuðu hundrað töflur af blóðþrýstingslyfinu hydramil rúmar 1200 krónur en kosta tæplega 2600 krónur í dag undir nýju heiti. Þunglyndis- og geðlyfið amilin kostaði 829 krónur. Actavis tók það af markaði og selur í dag amitryptiline, sem er í grunninn sama lyf, og kostar sama magn af lyfinu í dag, þ.e glas með hundrað töflum, 4.400 krónur. Munurinn er svo mest sláandi á folinsýru, ákveðinni tegund B-vítamíns sem þungaðar konur þurfa mest á að halda á meðgöngu. Eitt hundrað töflur kostuðu 952 krónur en kosta í dag undir nýju heiti, Actavis Folin Acid (e. Actavis fólinsýra) 5.110 krónur. Þessara upplýsinga var aflað í dag með einu símtali í apótek.

Í þessu samhengi þarf að taka til athugunar að álagningarreglum á mörg þessara samheitalyfja hefur verið breytt. Að sögn Hauks Ingasonar í Garðsapóteki skýrir það hins vegar ekki þennan mikla verðmun.