Ekki ætlunin að grípa fram fyrir hendur Hæstaréttar

Seðlabanki Íslands og Fjármálaeftirlitið hafa birt bréf sín við fyrirspurnum umboðsmanns Alþingis um tilmæli þeirra til fjármálafyritækjanna vegna gengistryggðu lánanna.

Seðlabankinn segir að það hafi ekki verið ætlunin að grípa fram fyrir hendur Hæstaréttar þótt því sjónarmiði hafi verið haldið á lofti í umræðunni. Seðlabankinn segir ennfremur að hlutverk sitt sé að viðhalda fjármálastöðugleika og segist sannfærður um að tilmælin hafi verið til þess fallin.

„Það er ekki hlutverk Seðlabanka Íslands að dæma í málum er varða einkaréttarlegar kröfur. Það er hins vegar hlutverk Seðlabanka Íslands að gæta að og varðveita fjármálastöðugleika og það hlutverk verður Seðlabankinn að rækja vel, með almannahagsmuni að leiðarljósi, og fara þær leiðir sem honum eru færar til þess að ná því markmiði. Seðlabankinn er sannfærður um að útgáfa tilmælanna hafi verið vel til þess fallin."