Samdi lög um vikudagana

Djassarinn Árni Ísleifsson hefur samið lög um alla vikudagana. Af því tilefni heldur hann tónleika með Stórsveit Öðlinga næstkomandi þriðjudag.

„Mér datt þetta allt í einu í hug,“ segir Árni. Undanfarin tíu ár hefur hann spilað með Dixieland-hljómsveit sinni og samdi lögin upphaflega fyrir hana.

„Svo voru svokallaðir Öðlingar komnir með blásarasveit. Það voru svo margir í hvort tveggja að við skelltum þessu saman í stórsveit. Ég þurfti að endurskrifa útsetningarnar því það bættust við fimm manns en það gekk þokkalega,“ segir Árni. Hann er 82 ára en Öðlingarnir eru í Öðlingaklúbb FÍH sem samanstendur af djössurum sem eru yfir sextugt.

Árni segir að æfingarnar fyrir tónleikana, sem verða haldnir á Rosenberg, hafi gengið vel. Í framhaldi af þeim ætlar sveitin að spila í Ráðhúsi Reykjavíkur síðar í mánuðinum á svokölluðu maraþonstórsveitarmóti, þar sem stórsveitir úr tónlistarskólum verða á meðal gesta.

Árni er margreyndur píanóleikari og djassari. Hann hóf feril sinn árið 1945 er hann spilaði með hljómsveit Björns R. Einarssonar í Listamannaskálanum, sem var við hliðina á Alþingishúsinu. Hann rak Djasshátíð Egilsstaða fyrstu átján árin og hefur á ferli sínum gefið út eina vinylplötu sem kom út 1984 og tvo geisladiska. Annar diskurinn hét Portrait of a Woman, sem hafði að geyma tíu lög um mismunandi líkamsparta kvenna, og sá síðasti hét Rökkurblús sem kom út fyrir tveimur árum. Árni ætlar ekki að gefa lögin um vikudagana út á geisladiski og stefnir frekar á dinner-plötu þar sem hann verður einn við píanóið í rólegheitagírnum.

Djasssöngkonan Hildur Guðný Þórhallsdóttir hitar upp á tónleikunum á þriðjudag, sem hefjast klukkan 21, með því að syngja nokkur lög eftir Árna. Að því loknu tekur Stórsveit Öðlinga við og flytur lögin sjö um vikudagana.freyr@frettabladid.is