Facebook í meiriháttar ímyndarkrísu

Síðustu daga hafa verið haldnir margir krísufundir í höfuðstöðvum Facebook í Kaliforníu.

Stofnandinn, Mark Zuckerberg, ætlaði að halda upp á 26 ára afmælið sitt með stæl í Karabíska hafinu síðastliðinn föstudag. Í staðinn eyddi hann helginni í fundarherbergi þar sem reynt er að skipuleggja aðgerðir til að róa notendur samskiptavefsins í kjölfar umdeildra breytinga á því hvaða upplýsingar teljast einkamál notenda.

Ekki nóg með það, heldur er Zuckerberg einnig farinn að hafa verulegar áhyggjur af myndinni sem kvikmynd leikstjórans David Fincher, The Social Network, dregur upp af honum. Róa Facebook-menn nú öllum árum að því að breyta ímynd Zuckerberg í "góða gæjann" áður en skaðinn er skeður.

Handrit myndarinnar lak nefninlega á Netið fyrir skömmu. Þar er Zuckerberg lýst sem frekar miklum hálfvita sem skrifaði kóðann að Facebook í ölæði eftir að kærasta hans sagði honum upp. Upprunaleg hugmynd vefsins var þannig að birta myndir af skólasystrum hans í Harvard þannig að hann og vinir hans gætu gefið þeim einkunn eftir útliti.

Leikarinn Jesse Eisenberg fer með hlutverk Zuckerbergs í myndinni og Justin Timberlake leikur félaga hans Sean Parker. Sá tók þátt í stofnun síðunnar Napster á sínum tíma og gekk síðan til liðs við Facebook.

Sagt er frá því hvernig þeir útiloka harkalega alla sem tóku þátt í verkefninu með þeim en það orsakaði réttarhöld þar sem þurfti að borga formúgur í bætur. Einnig að aðalhvati Zuckerberg hafi ekki verið frami og frægð heldur óöryggi í kynlífi. Aðaláhugamálið hafi verið að kela við kvenkyns aðdáendur síðunnar á börum á meðan Parker rak fyrirtækið.

Myndin verður frumsýnd í október. Framleiðandi hennar er leikarinn og leikhússtjórinn Kevin Spacey.