Hertar aðgerðir til að innheimta sektir

Ríkisendurskoðun segir lítinn hluta sekta vegna skattalagabrota innheimtast og megi gera ráð fyrir að meirihluti þeirra sem fundnir verði sekir um skattalagabrot á næstunni afpláni refsingu sína í formi samfélagsþjónustu.

Fram kom á vefsíðu Ríkisendurskoðunar í vikunni að frá júlí 2008 fram til mars á þessu ári hafi Fangelsisstofnun borist mál 44 einstaklinga sem dæmdir höfðu verið til að greiða sektir sem voru níu milljónir króna eða hærri. Samanlögð sektin hljóðaði upp á 1,3 milljarða króna. Samkvæmt upplýsingum sem Ríkis-endurskoðun hafi aflað sér hafi 81 prósent sekta verið greidd með samfélagsþjónustu.

„Okkur fannst rétt að vekja athygli á þessu. Það hefur gengið mjög illa að innheimta sektir vegna skattalagabrota,“ segir Sveinn Arason ríkisendurskoðandi. Hann bendir á að samkvæmt íslenskum lögum felist refsingar ýmist í fésekt eða fangelsi. Geti maður sem dæmdur er til sektar ekki greitt hana þurfi viðkomandi að afplána vararefsingu í formi fangelsisvistar. Undanfarin ár hefur vararefsing vegna hvítflibbabrota nær ávallt verið afplánuð með samfélagsþjónustu vegna skorts á fangelsisrýmum. Hámark refsingarinnar er sex mánuðir.

Ríkisendurskoðun bendir jafnframt á að þeim hafi fjölgað sem logið hafi til um greiðslugetu sína og frekar viljað inna af hendi samfélagsþjónustu. Efla verði úrræði yfirvalda til að kanna fjárhagsstöðu þeirra sem fundnir eru sekir um hvítflibbabrot þegar háar sektir blasi við.

Ragna Árnadóttir dómsmálaráðherra segir unnið að því að fjölga fangaplássum og vísar til þess að fangelsið Bitra í Flóahreppi verði opnað á föstudag. Seint í síðasta mánuði voru þangað komnir fimm fangar en nokkur pláss eru frátekin fyrir þá sem boðaðir hafa verið til að afplána vararefsingu vegna fésekta. „Með því einu að boða fólk til afplánunar út af fésektum myndast hvati til að greiða þær,“ segir hún. jonab@frettabladid.is