Mikið af amfetamíni í umferð um helgina

Lögreglan í Vestmannaeyjum og í Borgarnesi hefur lagt hald á talsvert meira magn af fíkniefnum um verslunarmannahelgina í ár en undanfarin ár. Amfetamín er áberandi á Þjóðhátíð. Lögreglan í Borgarnesi hefur tekið mikið af kannabisefnum ætluðum til sölu á Akureyri og Snæfellsnesi.

Lögreglan í Vestmannaeyjum hefur haft afskipti af þrjátíu og sjö fíkniefnamálum það sem af er Þjóðhátíð en samtals hefur verið lagt hald á nálægt 300 grömmum af fíkniefnum. Um er að ræða töluvert meira magn af efnum en síðustu ár.

Að sögn lögreglunnar í Vestmannaeyjum hefur mest fundist af amfetamíni, eða um helmingur alls þess sem tekið hefur verið, en einnig hefur verið þó nokkuð um kókaín. Fólkið sem hefur verið tekið með fíkniefni í Eyjum um helgina er á aldrinum 18-30 ára.

Lögreglan í Borgarnesi hefur haldlagt á bilinu 400-500 grömm af fíkniefnum það sem af er helginni, sem er líkt og í Eyjum talsvert meira magn en í fyrra og árið þar á undan. Nær eingöngu er um að ræða kannabis.

Flest málin hafa komið upp við umferðareftirlit á svæðinu og eru nokkrir grunaðir um akstur undir áhrifum fíkniefna. Lögreglan telur að efnið sem haldlagt hefur verið hafi verið ætlað til sölu á Akureyri og vestur á Snæfellsnesi.

Þórarinn Tyrfingsson, formaður SÁA, segir ekki koma á óvart að mikið sé um amfetamín í Eyjum, það sé í samræmi við þá þróun sem hann hafi séð á síðustu tveimur árum. Amfetamín sé mun ódýrara en kókaín, enda hafi neysla á kókaíní snarminnkað eftir efnahagshrunið.

Hann segir að þó lögreglan hafi lagt hald á meira magn af fíkniefnum í ár en undanfarin ár þýði það ekki að meira magn sé í umferð. Aukin samvinna við tollgæslu og meira eftirlit geti verið skýringin.