Tekinn með 42 grömm af amfetamíni á Þjóðhátíð - 32 fíkniefnamál

Karlmaður fæddur árið 1987 var handtekinn á Þjóðhátíð í Vestmannaeyjum um klukkan 21 í gærkvöldi með 42 grömm af amfetamíni. Maðurinn játaði að eiga efnin en hann var nýkominn inn á hátíðarsvæðið þegar lögreglan fann efnin á honum við hefðbundið eftirlit.

Hann var færður upp á lögreglustöð þar sem skýrsla var tekin af honum og var honum síðan sleppt. Talið er að efnin hafi verið ætluð til sölu.

Málið er keimlíkt fíkniefnamáli sem kom upp í fyrradag þegar að karlmaður á svipuðum aldri var tekinn með 44 grömm af amfetamíni á leið inn í Herjólfsdal.

Samkvæmt upplýsingum frá Jóhannesi Ólafssyni, yfirlögregluþjóni, hefur lögreglan lagt hald á vel á þriðja hundrað grömm af fíkniefnum á hátíðinni. En 32 fíkniefnamál hafa komið upp enn sem komið er.

Þá fór Lögreglan í Vestmannaeyjum í eina húsleit í heimahús í gær og fann þar 8 grömm af amfetamíni.