Skipsverjar af Octopus kafa í Silfru

„Já, það eru tveir frá þeim sem eru hérna með okkur. En þetta er ekki Paul Allen sjálfur, bara einhverjir af áhöfninni," segir Tobías Klose hjá Dive.is sem er að fara kafa í Silfru með tveimur úr áhöfninni á risasnekkjunni Octopus, sem er í eigu auðjöfursins Pauls Allen. Snekkjan kom hingað til lands á fimmtudaginn og kom fram í fréttum að áhöfnin hafi kannað möguleika til að kafa á Þingvöllum.

Tóbías segist ekki vita hvaðan mennirnir eru en þeir tali að minnsta kosti fína ensku. Hann býst við því að þetta verði skemmtilegt en áætlað er að byrja kafa núna á næstu mínútum. „Já er það ekki? Við gerum þetta á hverjum degi, þeir eru líka vanir kafarar þannig það er bara gaman."

Hann segist ekki vita hvort að menn af áhöfninni hafi farið að kafa hjá skipinu. „Það veit ég ekki, en ég hef lesið um það í fréttum. Ég ætla að spyrja þá út í það á eftir, það geturðu verið viss um. Þetta er allt svolítið spennandi."

Eins kom fram í fréttum í gær stóð til að skipverjar af áhöfninni hyggðust kafa niður af tveimur skipsflökum. Eftirlitsskipinu Hamilton og olíuskipinu Shirlon, en bæði skipin sukku í seinni heimsstyrjöldinni.

Risasnekkjan Octopus er ein sú stærsta í heimi, 126 metrar á lengd eða um 50 metrum lengri en Herjólfur. Tveir kafbátar eru í snekkjunni.