Laxadauði í Norðurá

Farið er að bera á laxadauða í Norðurá í Borgarfirði vegna þurrka. Ástandið er verra en sumarið 2007. Að sögn leiðsögumanna við Norðurá er ástandið orðið alvarlegt. Áin er við það að þorna upp og minnir ástandið á þurrkana sumarið 2007, en er þó öllu verra að þessu sinni þar sem áin nær ekki að kólna á næturnar

Páll Þór Ármann, framkvæmdastjóri Stangaveiðifélags Reykjavíkur, segir að aðstæður í Borgarfirði hafi verið erfiðar í sumar

„...og Norðuráin hefur ekki sloppið þar undan, það eru búin að vera viðvarandi hlýindi, sól og verulegt vatnsleysi og þegar allt þetta leggst ám líður laxinum ekki vel í ánni, hún verður heit og súrefnisupptakan verður léleg. Og það hefur borið á því að einstaka einstaklingar hafa ekki ráðið við þessar aðstæður og sérstaklega ef þeir hafa marist eða skaddað hreistur við að stökkva á fossa eða annað slíkt þá er erfitt að fá það til að gróa í svona heitri á og þeir ráða ekki við þessar aðstæður og einstaka laxar deyja við þessar aðstæður," segir Páll Þór.

Hann segir að um sé að ræða fáa laxa í hlutfalli við stofninn

„Það eru kannski fimm til sex þúsund laxar að ganga í ánna, kannski fjögur til sex þúsund og þegar nokkrir einstaklingar ráða ekki við þetta þarf bara svo að vera. En við köllum eftir rigningunni sem er verið að spá núna og vonumst til að hún komi og hressi upp á vatnsbúskapinn, en ég held að það séu erfiðar aðstæður víða um land hvað varðar vatnsbúskap."