Aðstoðuðu vélarvana bát skammt frá landi

Björgunarsveitin Lífsbjörg þurfti að aðstoða vélarvana bát um hálf ellefu leytið í morgun. Fjórir björgunarsveitamenn fóru á björgunarskipinu Björgu til aðstoða bátinn, en að sögn Páls Stefánssonar í björgunarsveitinni var enginn hætta á ferð.

Báturinn, sem heitir Bára ÍS-200, var um eina og hálfa mílu frá Svörtuloftum þegar skyndilega drapst á vélinni. Ekki var hægt að fá bátinn aftur í gang og því var kallað á björgunarsveitna sem dró hann í land og var björgunaraðgerðinni lokið klukkan eitt í dag.

„Þetta gekk mjög vel og það var engin hætta á ferðum. Í fyrstu var þó óttast að báturinn myndi reka á land en svo reyndist ekki vera," segir Páll.