Skorar á fagráð kirkjunnar að gefa upp fjölda mála

Forstöðukona Stígamóta skorar á fagráð kirkjunnar sem sér um meðferð kynferðisbrota að gefa upp fjölda mála sem til þess hafa borist. Hún segir það á skjön við hlutverk ráðsins að ætla að þegja um starfsemi þess líkt og formaður þess vill.

Eins og fram kom í fréttum RÚV í gær var starfsmanni kirkjunnar var vikið úr starfi í fyrra vegna kynferðisbrota gagnvart barni. Þar var rætt við Gunnar Rúnar Matthíasson, formann fagráðs kirkunnar um meðferð kynferðisbrota sagði að málinu hafi verið vísað til barnaverndanefndar.

Hann sagði fleiri en eitt mál hafa komið til kasta fagráðsins en neitaði að gefa upp fjölda þeirra.

Guðrún Jónsdóttir, forstöðukona Stígamóta, segir að brot í skjóli embættisvalds séu erfiðari en flest önnur. Kirkjan hafi staðið sig vel með því að stofna fagráð um meðferð kynferðisbrota, slíkt mættu fleiri stéttir gera.

Allt uppi á borðum

Fagráðið verði þó að sýna að það taki þessi mál alvarlega og að allt sé þar uppi á borðum. Hún segist því ekki trúa öðru en fjöldi málana verði gefin upp og skorar á fagráðið að gera það sem allra fyrst.

DV opnaði á umfjöllun um fagráðið í gær með því að greina frá því að Guðrún Ebba Ólafsdóttir, dóttir Ólafs Skúlasonar fyrrverandi biskups hefði á sínum tíma stutt konu sem óskaði eftir áheyrn kirkjuráðs þar sem hún vildi greina frá kynferðisofbeldi sem ólafur hafði beitt hana.

Guðrún Ebba hvetur til þess að kirkjan taki skýra afstöðu gegn kynferðisfobeldi og taki virkan þátt í baráttu gegn því. Í tilkynningu sem femínistafélagið sendi frá sér í morgun er tekið undir með Guðrúnu Ebbu en jafnframt fagnað þeim skrefum sem þjóðkirkjan hefur þegar tekið til að bregðast við kynferðisofbeldi.