Stórleikirnir í brennidepli í þætti Hjörvars og Gumma

Fótboltasérfræðingarnir Hjörvar K. Hafliðason og Guðmundur Benediktsson stjórna nýjum sjónvarpsþætti um enska boltann á Stöð 2 Sport 2 í vetur.

„Þetta verða ég og Gummi strax eftir stórleikinn á sunnudegi,“ segir fótboltasérfræðingurinn Hjörvar K. Hafliðason. Þeir Guðmundur Benediktsson stjórna nýjum sjónvarpsþætti um enska boltann á Stöð 2 Sport 2 í vetur. DV greindi frá því í gær að Hjörvar væri að skipta um vettvang og nú er komið í ljós að enski boltinn verður viðfangsefni hans.

„Við munum ekkert dvelja lengi yfir leikjum eins og West Brom-Blackpool en það verður farið ítarlega í stóru leikina, stóru ákvarðanirnar og vafaatriðin. Við munum reyna að hafa eitthvað skemmtilegt í þessu líka,“ segir Hjörvar og hlakkar til samstarfsins við Gumma Ben. „Guðmundur er afar orðheppinn og fyndinn maður og áhorfendur munu njóta þess líka. En þetta verður fyrst og fremst hrikalega skemmtilegur þáttur sem menn vilja vonandi ekki missa af. Öfugt við þátt Guðna Bergs þá höfum við þáttinn á sunnudögum og segjum alla sögu helgarinnar.“

Góður gestur verður fenginn í hvern þátt og ýmsir áhugaverðir dagskrárliðir verða kynntir til sögunnar. „Það verður ákveðið uppgjör í lok hvers þáttar, valinn besti leikmaðurinn, besti stjórinn og pappakassi umferðarinnar,“ segir Hjörvar. Hann bætir við að rykið verði einnig dustað af gömlum hetjum úr enska boltanum á borð við Bruce Grobbelaar, Matthew Le Tissier, Vinnie Jones, Faustino Asprilla og Eric Cantona.

Hjörvar hefur verið fótboltasérfræðingur í Sjónvarpinu í sumar. Hann hefur fjallað um íslenska boltann ásamt Hirti Hjartarsyni og var hluti af sérfræðingunum sem slógu í gegn í HM-þættinum undir stjórn Þorsteins J. „Maður hefur lært fullt af flottum hlutum á RÚV. Það er búið að vera gaman að vinna þar, sérstaklega með Hirti Hjartarsyni. Hann hefur sett umfjöllun um vinsælustu íþrótt á Íslandi á allt annað plan á RÚV.“

Ekki er komið á hreint hvort Hjörvar heldur áfram umfjöllun sinni um íslenska boltann í Sjónvarpinu eftir að enski boltinn byrjar 14. ágúst. Fari svo kemur upp sú staða að hann verður sérfræðingur samtímis á Stöð 2 Sport 2 og í Sjónvarpinu í rúman mánuð, eða þangað til íslenska boltanum lýkur. Fulltrúi íþróttadeildar Sjónvarpsins vildi ekkert tjá sig um framtíð Hjörvars á stöðinni þegar Fréttablaðið leitaði eftir því.

freyr@frettabladid.is