Söngskólinn með Djammstaff

Nemendaópera Söngskólans sýnir óperuna Don Djammstaff í samvinnu við Íslensku óperuna. Óperan er samsett úr sautján atriðum úr fjórtán óperum eftir níu tónskáld og sungin á fjórum tungumálum. Söguþráðurinn snýst um ævintýri vampírunnar Don Djammstaff, sem er yfir sig ástfanginn af mennskri konu, Paminu, og setur allt í uppnám til að ná ástum hennar. Inn í framvinduna fléttast hefndir kvenna og vald örlaganna.

Alls tekur 31 af nemendum Óperudeildar Söngskólans í Reykjavík þátt í sýningunni og bregður sér meðal annars í gervi vampíra, verndarengla og norna. Anton Steingruber og Hrönn Þráinsdóttir hafa annast tónlistarundirbúning og Hrönn leikur undir á píanó. Leikstjóri sýningarinnar og höfundur dansa er Sibylle Köll. Tvær sýningar eru ráðgerðar á verkinu, í kvöld kl. 20 og á laugardaginn 6. febrúar kl. 14.