Afstaða Íslands ekki rædd við formann utanríkismálanefndar

Ekkert samband var haft við Árna Þór Sigurðsson, formann utanríkismálanefndar Alþingis, áður en tekin var sú ákvörðun að Ísland skyldi sitja hjá við atkvæðagreiðslu á Allsherjarþingi Sameinuðu þjóðanna í fyrradag.

Á þinginu var samþykkt tillaga um að aðgangur að hreinu vatni séu mannréttindi. Alls samþykktu 122 ríki ályktunina, enginn var á móti, en 41 sat hjá. Auk Íslands voru það Ástralía, Danmörk, Írland, Ísrael, Japan, Svíþjóð og Bandaríkin, svo dæmi séu nefnd.

Formaður utanríkismálanefndar Alþingis var ekki með í ráðum þegar afstaða Íslands í málinu var mótuð. Birgitta Jónsdóttir, þingmaður Hreyfingarinnar, hefur sent formanni nefndarinnar tölvupóst og farið fram á að nefndin komi saman vegna málsins. Árni Þór segist munu skoða málið þegar að hann kemur til Reykjavíkur. Hann er nú staddur í fríi utan Reykjavikur og fagnar fimmtugsafmæli sínu í dag.