Krakkarnir í sviðsljósinu næstu tvö sumur

Fótboltakrakkarnir á Íslandi verða í sviðsljósinu á Stöð 2 Sport næstu tvö sumur eftir að Stöð 2 og KSÍ gerðu með sér samkomulag um samstarf þar sem markmiðið er að stórauka stuðning og umfjöllun um fótboltaiðkun æskunnar.

Samningurinn var undirritaður í gær og í honum felst meðal annars að Stöð 2 Sport skuldbindur sig til að minnsta kosti 35 beinna útsendinga frá leikjum í Pepsi-deild karla, fimm leikja í Visa-bikarkeppni karla, útsendinga frá útileikjum A-landsliðs karla og vináttulandsleikja þess á Íslandi.

Stöð 2 Sport hefur gert vel í að sýna frá íslenska fótboltanum undanfarin ár en nú ætla menn þar á bæ að gera enn betur og þá sérstaklega að fjalla mun meira um fótboltaiðkun yngri flokka hér á landi. Stöð 2 mun fjalla ítarlegar um sumarmótin vinsælu, sem stöðin hefur þegar gert góð skil í sérstökum þáttum undanfarin sumur. Að auki verða framleiddir og sýndir á Stöð 2 Sport vandaðir þættir um fótboltaiðkun ungs fólks og munu sportstöðvar Stöðvar 2 einnig taka að sér framleiðslu og sýningar á kennslumyndböndum í boltatækni.

„Aukin þáttagerð tengd iðkun ungmenna er liður í áherslubreytingum á Sportstöðvunum þar sem meiri áhersla er lögð á fjölskylduefni samhliða útsendingum frá stærstu íþróttaviðburðum hér á landi og um heim allan. Okkur rennur líka blóðið til skyldunnar því að niðurstöður nýlegrar könnunar sýna fram á að Sportstöðvarnar höfða meira til fjölskyldna en við gerðum okkur grein fyrir. Sama könnun leiddi í ljós að það er vöntun á því efni sem við erum að leggja meiri áherslu á. Það má því segja að leiðir okkar og KSÍ liggi saman að því markmiði að bæta úr þessu,“ sagði Ari Edwald, forstjóri 365 miðla, í fréttatilkynningu.- óój